ifada إفادة

ifada إفادة


حكاية الطفل سعيدو ...

الجمعة 30 مارس 2018 - 15:36 , افادة
حكاية الطفل سعيدو ...
المدون ؛ طارق بنحريف

#مشهد
قرا و بارطاجي ربما بالبرطاج تصنع تاريخ و تحقق حلم طفل....

هذا ماشي فيلم و ماشي قصة من وحي لخيال ....أي تشابه مع احداث او شخصيات في واقع هو متعمد ...على الله وعسى تحيى فينا الانسانية ...

سلام خويا طارق ...
الدري لي غدوي ليك عليه سميتو "سعيدو" جاي من غينيا الإستوائية، حاليا كيتواجد بجمعية "samucocial" فمدينة الدار البيضاء ...

هاد الدري بالنسبة ليا و لڭاع الناس لي كيعرفوه رمز من رموز العزيمة وقوة الإرادة، السطاج اللخر فالشجاعة و فالإيمان بالذات .

خرج من دارهم مني كان فعمرو 13 العام فاتجاه المغرب، باش يبدا مسيرة لاعب كرة قدم محترف و يكمل فأوروبا ...

الرحلة استغرقات منو 3 سنوات باش يوصل، كان فيما كيوصل لشي بلاد كيبرك فيها واحد الفترة كيخدم يضبر على راسو ويجمع مصيريف باش يتحرك ويخلص الطرونسبور وكدا ...
إلى أن وصل لمالي، البلاد لي تعتاقل فيها و تعرض للتعذيب رغم كونه لم يتجاوز 15 سنة ، و طلبات فيه  الجماعات الارهابية فدية باش يخرج هو ومجومعة من الأطفال و الناس لي كانو تعتاقلو بسبب انهم دازو من مناطق متوثرة سياسيا ...

ورغم الفقر ديالو وديال عائلتو ..تقاتلات العمة ديالو باش جمعات دوك الفلوس لي كان خاصين وخلصات عليه باش خرج...
و الرائع فالأمر أنه فاش خرج مارجعش لغينيا وإنما كمل الرحلة ديالو و مشا للجزائر و من الجزائر جا للمغرب ...

و تخيلو معايا دري عندو 16 لسنة جاي من غينيا فرحلة تاع 3 سنوات وحاط قدام عينيه هدف واحد، هو يولي لاعب كرة قدم محترف...
ولكن فاش وصل للمغرب و دخل لكازا بقا كينعس غا فالزنقة و كيبريكولي بريكولات تاع والو باش يعيش و يضبر فالخبز والما ... تال واحد النهار أيلقاه واحد السيد و غايدي ويجيب معاه فالهضرة و جابو  للمركز ديال الجمعية باش على الأقل يلقا ماياكل و فين ينعس بينما يدير ليه مولانا تاويل ديال الخير .

لكن لسوء الحظ، سعيدو دوز 6 شهور فالجمعية و غير بارك وكايقتلو الملل بحكم أنه  أنه الأجنبي الوحيد و ماكيقدرش يتواصل لغويا مع الأطفال لوخرين ، 6 شهور وهو بارك غير كيتسنا بدون تا فائدة، تا شي واحد ماقدر يحل ليه شي باب ، حياتو موقفة حرفيا .

مؤخرا دخل فنوبة يأس حقيقية و بان ليه ڭاع ديك الطريق الكحلة و ديك المعانات لي عانا أتضرب ليه فالزيرو .. طفل من سن 13 سنة قرر أنه ينتافض على الأضاع فهاد القارة الكحلة وحاول يتقاتل مع الوجود كامل باش يوصل ..ولكن بعض المرات العقبات كتكون كثيرة وكبيرة كثر من القياس و الدنيا ماتترحمش ، فهاد اللقطة يا كيسيفط ليك الله شي فاعل خير يدير ليك شي دفيعة فين تزيد تقاتل ..ولا كتهرس وتموت.

بس 1 : الدري يتيم الأم ، وعندو جوج خوتو صغر منو و باه .

بس 2 : نوع المساعدة التي نرجوها هي أنه شي فرقة تتكف بيه من ناحية السكن و المطعم و تعطيه فرصة فين يطريني و يولي لاعب ، بمعنى آخر، كنطالبو بالحق في فرصة !

بس 3 : الدري لاعب موهوب بشكل عظيم ...  خاتر ديال بصح ،، اللعب ديالو فايتو فالعمر .

بس 4 : والله يتا ماخليت فين مشيت على قبلو ..أنا غا طالب و مقودة عليا بهاد الحرف، أما بربي تانخلص عليه فأحسن فرقة لأنه دري خارج عن المألوف ... مستوى عظيم من الشجاعة والجرأة في وجه الحياة...دري مايستاحقش يموت بلا مايوصل لداكشي لي بغا ...دري كنحس بيه قادر يهز جبل ويحولو من بلاصتو ..خاص غير تعطاه فرصة ..الحق في فرصة .


التعليقات

كل التعليقات الموجودة في الموقع لا تعكس وجهة نظرنا

لا يوجد تعليق في الوقت الراهن

أضف تعليقك أيضا

أخبار ذات صلة

تابعونا على :